Testua eta irudiak: Elena Ferrándiz
Legua, 2012
30 orrialde
ISBN 978-84-938841-3-0
Ekintza Ikastolako LH2B mailakoek Hilos de colores irakurri dute, Elena Ferrandizek idatzia eta marraztua.
Amonak bilobari Koloretako hariak izenburua duen oroitzapenen liburu bat oparituko dio. Azalean bilobaren jaiotze data dago eskuz josita. Barruan, umetatik soineko bat josten ikasten duen neskatoa ageri da.
Bere oroitzapenak diren kolore guztietako hariak nahasten dira soineko horretan: amaren irribarrearen ezpainetakoa, ibaiertzeko arratsaldeen zeruko urdina, bere aitonaren agurraren beltza, edota lehenengo musuaren gorri kolore bizia… Soinekoaren hasierako koloreei gehiago batzen joango zaizkie bidean, soineko luze-luzea egin arte. Egun batean, ordea, zulotxo bat agertuko da soinekoan. Garranzi handiegirik eman gabe, kontu handiz josiko du eta berria bezala geratuko da. Baina gero beste zulo bat azalduko da, eta beste bat… Zenbat eta gehiago konpontzen saiatu, orduan eta zulo handiagoa egingo da.
“Oroimena, haizeak eramaten dituen hariak bezain hauskorra izan daitekeelako batzuetan eta ia dena ahazten denean, sendagairik onena musuak direlako”.
Espainiako Alzheimer fundazioarekin elkarlanean sortutako lana da hau eta sentiberatasun eta samurtasun handiz lantzen du gaia eta bizitzaren esperientzia paregabeak.