Testua: Fran Pintadera
Irudiak: Loreto Aroca
Ediciones SM, 2017
48 horrialde
ISBN: 9788467594362
Ez da ohikoa irakurle gazteek bertso-lerrotan idatzitako liburu bat aukeratzea eta, gainera, gustuko izatea. Hau da Aitor Ikastolako LH4ko ikasleek gomendatutako liburu honen kasua, 2017an “Luna de Aire” haur-poesiaren XIV. saria jaso zuena. Bertan, Pinzón familia bitxiko kideak agertzen zaizkigu, guztiak ere beren arazo, bitxitasun, bertute eta akatsekin. Bere orrialdeetan zehar pertsonaiek dituzten arazo eta haserreek konponbidea badutela egiaztatzen dugu eta guztiok ditugun akatsen onarpenari buruz hausnartzera bultzatzen gaitu.
Istorioa bertso-lerrotan idatzita dago, errima dibertigarriekin, gazteei poesiaren munduan modu atseginean sartzeko aukera emanez. Egileak hitz-joko eta sinonimo interesgarriak erabiltzen ditu, irakurle gazteenei hizkuntzaren aberastasuna eta aukerak erakutsiz.
Loreto Arocaren ilustrazioek karikatura-kutsua dute, argitasun tekniko egokia, marra argiak eta kolore beroak itzaleztapen polit batekin, eta pertsonaien adierazpenek garbiro islatzen dituzte haien gogo-aldarteak.