Aitor ikastolako LH-5B gelako eta Harri Berri Oleta ikastolako 3. zikloko ikasleek magia kontuak ikasi dituzte Hans Geel-en Magia trukurik onenak liburuarekin. Bertan benetako magoek egiten dituzten truko pila bat kontatzen dira. Artxila murtxila...

La Salle ikastolako LH-1B gelatik Las princesas también se tiran pedos, Ilan Brenman-en eta Ionit Zilberman-en liburua gomendatu digute.

Ikastolan Errauskineri buruzko eztabaida luze baten ostean, Laurari zalantza garrantzitsu bat sortu zaio, Marcelok aitortu baitie Errauskine ospetsu eta lirainak puzker pila bat botatzen zituela. Eskerrak Lauraren aitari asko gustatzen zaion irakurtzea eta printzesei buruzko liburu sekretu bat daukan. Liburu horretan aurkituko ditu Laurak dituen galdera guztien erantzunak.

Jakintza ikastolako LH-3A gelako ikasleei dibertigarria iruditu zaie Puzkertin, Xabier Mendigurenen eta Eider Eibarren liburua, non umorez eta fantasiaz beteriko abentura bat kontatzen den:

Peru eta Marixe bikote maitemindu bat da. Peruk, gauetan, puzker galantak botatzen ditu ohean. Marixe, hotzak egoten denez, galtzerdi eta guzti sartzen da ohean, eta ohe barruan kentzen ditu. Gau batean, Peruren puzker bat Marixeren galtzetin baten barruan sartu, eta elkartze horretatik izaki harrigarri bat sortzen da: Puzkertin.

Ekintza ikastolako LH-2 mailako eta Ibai ikastolako LH-1B taldeko ikasleek Ahora me llamo Luisa (Jessica Walton-en liburua) gomendatu digute, transexualitateaz eta laguntasunaz hitz egiten digun album ilustratua.

Martin eta bere hartzatxoa, Luis, egunero dabiltza jolasean. Batzuetan Ada ere elkartzen zaie. Egun batean Martinek oso triste sumatzen du Luis, eta zer duen galdetzen dionean, Luisek esaten dio gehiago gustatzen zaiola Luisa izena, txikitatik neska sentitu delako, eta ez mutila. Norberak bakarrik daki neska ala mutila den, eta horrelako egoeretan ere garrantzitsuena laguntasuna da, lagunen babesa eta maitasuna baduzula sentitzea.

Orixe ikastolako LH-1A gelakoek Jazz naiz (Jessica Herthel-en) liburua gomendatu digute.

Jazz-ek beti jakin zuen ez zela bere adineko neska-mutilak bezalakoa. Bi urteko ume txikia zenetik sentimendu indartsu batez jabetu zen: bera neska zela eta bere ingurukoek onartu egin behar zutela, jaiotzean mutiltzat hartu bazuten ere, zakila zuelako. Arrosa kolorea eta sirenaz mozorrotzea gustukoa zuen, eta mutilen arroparekin, berriz, ez zen eroso sentitzen. Egoera horren aurrean, familiak ez zekien nola jokatu, baina elkarri lagunduz Jazz transexuala zela ulertu zuten.

Jazz-en istorioa egiazko esperientzia da eta azken aldian horrelako hainbat kasu ezagutu ditugu gure inguruan ere.

Fabulosos escarabajos (Sue Unstead, Gill Tomblin) gomendatu digute Orixe ikastolako LH-4B gelako ikasleek. Ikaragarri intsektu pila daude Lurra planetan, izaki ugarienak dira. Kakalardoen artean bakarrik, 300.000 espezie desberdin daude, mota eta neurri desberdinetakoak: batzuk ikusezinak dira gizakiontzat eta beste batzuek, aldiz, 15 cm inguru neur dezakete. Kakalardoei buruz gehiago jakin nahi baduzu, liburu hau interesatuko zaizu.

Orixe ikastolako LH-1B gelakoek Animalien zergatia (Consuelo Delgado, Teresa Novoa) gomendatu digute eta Herri Ametsa ikastolako LH-4A gelakoek Erlauntza (Pascale Hédelin, Sophie Lebot).

Bi ezagutza-liburu hauetan animaliei buruzko informazioa jasotzen da: Zergatik egiten ote dute negar krokodiloek? Zergatik distiratzen dute hainbeste katuen begiek? Zergatik ibiltzen dira pinguinoak era xelebre horretan? Nolakoak dira erlauntzak? Zer funtzio betetzen dute erreginak edo erle langileek? Nola biltzen dute eztia?

Galdera horien eta gehiagoren erantzunak aurkituko dituzu bi liburu hauetan.

Gaur, Haur Liburuaren Nazioarteko egunean gomendatzeko liburu eder bat Charo Pitaren Eskerrik asko! da.

Liburu honetan, Enara izeneko biloba batek galderak egiten dizkio amonari: “Itsasoa zergatik gelditzen da hondarretan eta zergatik ez du herri osoa irensten urezko ahoarekin? Zerk eusten dio ilargiari zerutik erori gabe? Nork margotzen ditu hodeiak?” Amonak ez dauzka erantzunak, baina irakasten dio batzuetan nahikoa izaten dela gauza guztiak jakin, ulertu eta aztertu beharrean, gauza horiek gozatzea, sentitzea eta batez ere, eskertzea.

“Orduan, zimurrez marraztuta zegoen eskutik heldu zion Enarak amonari, eta hauxe xuxurlatu zion belarrira: Eskerrik asko, amona!”.

Gomendio hau Intxaurrondo ikastolako LH2 mailako ikasleena da eta ikaragarri gustatu zaigu. Eskerrik asko!

Gaur, apirilak 2, Haur Liburuaren Nazioarteko Eguna ospatzen da, egun honetan jaio zelarik, 1805. urtean, haur literaturako idazlerik ospetsuenetako bat: Hans Christian Andersen.

1967. urtetik geroztik ospatzen da Haur Liburuaren Nazioarteko Eguna, munduan zehar, haur eta gazteentzako kalitatezko liburuak bultzatzeko, eta gazteen artean irakurtzeko zaletasuna sustatzeko helburuarekin.

Eta hain justu, Intxaurrondo ikastolako LH2 mailako ikasleei asko gustatu zaizkie Gustavo Mazalik Ipuinak Andersen liburuan bildutako ipuinak: Enperadorearen jantzi berria, Ahatetxo itsusia, Urretxindorra, Sirenatxoa, Berunezko soldadu ausarta eta Mari Titare.

Aspaldikoak izan arren, oraindik ere gustura irakurtzen diren istorioak, ezbairik gabe.